गोरगाव पश्चिमेत सजावटीच्या युनिटला आग; सुदैवाने जीवितहानी टळली
मुंबई | प्रतिनिधी – गोरगाव पश्चिमेतील मोटीलाल नगर क्रमांक 2 परिसरात गुरुवारी सकाळी सजावटीच्या साहित्याच्या युनिटमध्ये आग लागल्याची घटना घडली. सुदैवाने या घटनेत कोणतीही जीवितहानी किंवा जखमी झाल्याची नोंद नाही.
सकाळी सुमारे 9:25 वाजता डी-मार्टसमोर असलेल्या ‘निधी डेकोरेटर’ या युनिटमध्ये आग लागल्याची माहिती मिळताच मुंबई अग्निशमन दलाने तात्काळ घटनास्थळी धाव घेतली. 9:37 वाजता या आगीला ‘लेवल I’ घोषित करण्यात आले. आग केवळ सजावटीच्या साहित्यापुरती मर्यादित राहिली आणि अग्निशमन दलाने अल्पावधीतच ती पूर्णपणे नियंत्रणात आणली.
या घटनेदरम्यान मुंबई अग्निशमन दल, स्थानिक पोलिस, वीज विभाग, 108 रुग्णवाहिका सेवा तसेच वॉर्ड कार्यालयाचे अधिकारी घटनास्थळी दाखल झाले होते. सर्व यंत्रणांनी समन्वयाने काम केल्यामुळे मोठी दुर्घटना टळली.
दरम्यान, आगीचे नेमके कारण अद्याप समोर आले नसून संबंधित यंत्रणांकडून तपास सुरू आहे. ही घटना पुन्हा एकदा अग्निशमन दलाच्या सतर्कतेचे उदाहरण ठरली आहे.
प्रतिनिधी सिंथिया कोरिया
