🎭 ज्येष्ठ अभिनेते सतीश शहा यांचे निधन; चित्रपटसृष्टीत शोककळा

🎭 ज्येष्ठ अभिनेते सतीश शहा यांचे निधन; चित्रपटसृष्टीत शोककळा

मुंबई :
बॉलिवूड आणि टीव्ही मनोरंजनविश्वातील ज्येष्ठ आणि लोकप्रिय अभिनेते सतीश शहा यांचे आज (२५ ऑक्टोबर) निधन झाले. गेल्या काही महिन्यांपासून ते किडनीच्या आजाराने त्रस्त होते. त्यांच्यावर मुंबईतील हिंदुजा रुग्णालयात उपचार सुरू होते, मात्र प्रकृती अधिक खालावल्याने त्यांनी आज अखेरचा श्वास घेतला. ते ७४ वर्षांचे होते. त्यांच्या निधनाने संपूर्ण चित्रपटसृष्टीत हळहळ व्यक्त होत आहे

सतीश शहा यांचा जन्म २५ जून १९५१ रोजी गुजरातच्या मांडवी येथे झाला. शिक्षण त्यांनी मुंबईतील सेंट झेवियर्स कॉलेज आणि फिल्म अँड टेलिव्हिजन इन्स्टिट्यूट ऑफ इंडिया (FTII), पुणे येथे पूर्ण केले. लहानपणापासूनच अभिनयाची आवड असलेल्या शाहांनी रंगभूमीपासून आपल्या कारकिर्दीची सुरुवात केली आणि नंतर चित्रपटसृष्टीकडे वळले.

सतीश शहा यांनी “जाने भी दो यारों”, “दिलवाले दुल्हनिया ले जायेंगे”, “मैं हूँ ना”, “कल हो ना हो” आणि “ओम शांती ओम” या हिट चित्रपटांमध्ये संस्मरणीय भूमिका साकारल्या.
टीव्हीवरील लोकप्रिय कॉमेडी मालिका ‘साराभाई वर्सेस साराभाई’ मधील त्यांची ‘इंद्रवदन साराभाई’ ही भूमिका आजही प्रेक्षकांच्या मनावर अधिराज्य गाजवते.

हिंदीसह सतीश शहा यांनी ‘गम्मत जम्मत’, ‘वाजवा रे वाजवा’ या मराठी चित्रपटांमध्येही भूमिका साकारल्या. ते मुंबईतील ताडदेव परिसरात वाढले आणि मराठी संस्कृतीत खोलवर रुजलेले होते.सतीश शहा यांच्यावर मुंबईत अंत्यसंस्कार होणार आहेत. त्यांच्या निधनाने भारतीय चित्रपटसृष्टीने एक विनोदी, बहुगुणी आणि लोकप्रिय कलाकार गमावला आहे.

🙏 सतीश शहा… श्रद्धांजली!

– रिपोर्टर : उमेश कुलकर्णी
(लोक वन न्यूज)