🏆 “क्रांतिवीर वसंतदादा बडवे हिंदुत्व शौर्य पुरस्कार” आनंदजी दवे यांना प्रदान

🏆 “क्रांतिवीर वसंतदादा बडवे हिंदुत्व शौर्य पुरस्कार” आनंदजी दवे यांना प्रदान

पंढरपूर :
क्रांतिवीर वसंतदादा बडवे यांच्या चाळीसाव्या पुण्यस्मरणानिमित्त आयोजित कार्यक्रमात “क्रांतिवीर वसंतदादा बडवे हिंदुत्व शौर्य पुरस्कार” यंदा ब्राह्मण महासंघाचे संस्थापक अध्यक्ष व महाराष्ट्र हिंदू महासभेचे कार्याध्यक्ष आनंदजी दवे यांना प्रदान करण्यात आला.

सदर पुरस्कार स्वीकारताना आपल्या भाषणात श्री. दवे म्हणाले —

> “सर्वोच्च न्यायालयाने आदेश दिल्यानंतरही धारावीतील बेकायदेशीर मशिदींवर कारवाई करण्याचे धैर्य या शासनात नाही; पण हेच शासन पंढरपुरातील हेरिटेज मठ, मंदिरे आणि घरांवर हातोडा चालविण्याचा प्रकल्प राबवते, हे अत्यंत दुर्दैवी आहे.”

ते पुढे म्हणाले की,

> “विद्यमान सरकारला हिंदुत्वाचा राजकीय फायदा मात्र हवा आहे, पण हिंदूंसाठी त्याग करण्याची तयारी नाही. पैशाने श्रीमंत मंदिरांचे ताबे सरकारने घेतले, पण गरीब देवस्थानांना कोणतेही अर्थसहाय्य दिले नाही. हिंदूंचे सरकार असताना सुद्धा सर्वाधिक ‘हिंदू जन आक्रोश मोर्चे’ काढावे लागतात — हे अत्यंत वेदनादायक आहे.”

यानंतर श्री. दवे यांनी पंढरपूरच्या विकासाचा मुद्दा उपस्थित करत सांगितले —

> “पंढरपूर मंदिराच्या कारिडॉरपेक्षा येथे कॉलेज आणि शिक्षण संस्थांची उभारणी अधिक आवश्यक आहे. येथील मुलांना उच्च शिक्षणासाठी पुणे-मुंबईकडे जावे लागते, हे दुर्दैव आहे.”

कार्यक्रमात वसंतदादा बडवे ट्रस्टचे अध्यक्ष व हिंदू महासभेचे नेते अभयसिंह ईचगावकर म्हणाले —

> “ज्या सावरकर पुतळ्यासाठी दादांनी घर विकायची तयारी ठेवली, तो पुतळा आज पंढरपुरात उभा आहे, आणि दादांचा पुतळा मंदिराच्या रक्षणासाठीच स्थापित झाला — ही अभूतपूर्व घटना आहे.”

कार्यक्रमाची सुरुवात श्री वैभव बडवे व श्री महेशाचार्य उत्पात यांनी विठ्ठल-रुक्मिणी पूजनाने केली. माजी नगरसेवक आणि पत्रकार महेश खिस्ते यांनी मागील पुरस्कारांचा आढावा घेतला.

ह. भ. प. वीर महाराज यांनी आनंदजी दवे यांच्या कार्याचा गौरव करताना म्हटले —

> “मनुस्मृतीप्रमाणे राज्य आले तर ब्राह्मणांनाच जगणे कठीण होईल; तरीही दवे यांनी केवळ ब्राह्मणांसाठी नव्हे, तर अखिल हिंदू समाजाच्या कल्याणासाठी निःस्वार्थपणे कार्य केले आहे.”

कार्यक्रमात मनोज तारे, मोहनराव मंगळवेढेकर, अनिल पवार आदींचीही भाषणे झाली.
पुरस्काराचे स्वरूप — रोख ₹११,०००, सन्मानचिन्ह, कुंडलिनी कृपाण, हिंदूध्वज, हार, शाल व श्रीफळ असे होते.

यावेळी हिंदू महासभेचे उमेश कुलकर्णी, नितीन शुक्ल, विवेक परदेशी, तृप्ती तारे व प्रशांत भालेराव यांचा विशेष सत्कार करण्यात आला.

या प्रसंगी विकासराव मोरे, काशिनाथराव थिटे, ह. भ. प. माऊली महाराज गुरव, रामसखा बडवे आदी मान्यवर उपस्थित होते.
कार्यक्रम यशस्वी करण्यासाठी प्रशांत खंडागळे, विठ्ठलराव बडवे, दीपक कुलकर्णी, महेश काळे यांनी परिश्रम घेतले.

प्रतिनिधी उमेश कुलकर्णी पुणे