🟢 ‘माझी वसुंधरा ५.०’ मध्ये पिंपरी‑चिंचवड महापालिका राज्यात प्रथम.

पिंपरी चिंचवड : राज्य शासनाच्या माझी वसुंधरा अभियान ५.० अंतर्गत दहा लाखांपेक्षा अधिक लोकसंख्या गटात पिंपरी-चिंचवड महापालिकेने राज्यात प्रथम क्रमांक मिळवत उल्लेखनीय कामगिरी केली आहे. या यशाबद्दल महापालिकेला १० कोटी रुपयांचे बक्षीस जाहीर करण्यात आले आहे.

अभियान कालावधीत स्थानिक स्वराज्य संस्थांनी राबविलेल्या उपक्रमांचे डेस्कटॉप आणि फिल्ड मूल्यांकन करण्यात आले. दोन्ही मूल्यांकनांतील एकूण गुणांच्या आधारे राज्यातील १४ गटांतील विजेते निवडण्यात आले. या प्रक्रियेत पिंपरी-चिंचवड महापालिकेने भूमी विषयांतर्गत उत्कृष्ट कामगिरी करत अव्वल स्थान पटकावले.

महापालिकेने पर्यावरण संरक्षण, हरित उपक्रम, कचरा व्यवस्थापन, जलसंवर्धन, ऊर्जा बचत आणि जनजागृती या क्षेत्रांत प्रभावी कामगिरी केली. शहरात मोठ्या प्रमाणावर वृक्षारोपण-संवर्धन, प्लास्टिक निर्मूलन, जलसंधारण प्रकल्प, घनकचरा व्यवस्थापन सुधारणा, हरित शाळा उपक्रम आणि सौरऊर्जा प्रकल्प राबविण्यात आले.

नागरिक, स्वयंसेवी संस्था, शैक्षणिक संस्था आणि औद्योगिक आस्थापनांच्या सक्रिय सहभागामुळे अभियानाला व्यापक यश मिळाल्याचे उपायुक्त डॉ. प्रदीप ठेंगल यांनी सांगितले.

महापौर रवी लांडगे म्हणाले की, “प्रथम क्रमांक हे महापालिकेच्या सर्व विभागांच्या समन्वयित कामकाजाचे आणि नागरिकांच्या सहभागाचे फलित आहे. भविष्यात शाश्वत विकासासाठी अधिक तांत्रिकदृष्ट्या सक्षम प्रकल्प राबवू.”

तसेच आयुक्त श्रावण हर्डीकर यांनी सांगितले की, “हे यश संपूर्ण शहराचे आहे. पर्यावरण संवर्धनासाठी शहर कटिबद्ध असून पुढील काळात तंत्रज्ञानाधारित आणि नवकल्पनात्मक उपक्रमांना अधिक चालना दिली जाईल.”

प्रतिनिधी : शाम शिरसाठ पुणे.