🗳️ तीन अपत्य असलेल्यांना निवडणूक लढविण्यावर बंदी — मुख्य माहिती आयुक्तांचे निर्देश.

मुंबई :

स्थानिक स्वराज्य संस्थांच्या निवडणुकांमध्ये दोनपेक्षा अधिक अपत्य असलेल्या व्यक्तींना उमेदवारी देता येत नाही, असा कायदा असतानाही काही उमेदवार आपली तीनपेक्षा जास्त अपत्ये लपवून निवडणूक लढवतात. अशा प्रकारांना आळा बसावा म्हणून राज्याचे मुख्य माहिती आयुक्त राहुल पांडे यांनी राज्य सरकार आणि राज्य निवडणूक आयोगाला कठोर उपाययोजना करण्याच्या सूचना दिल्या आहेत.

या संदर्भात त्यांनी गैरप्रकार टाळण्यासाठी मानक कार्यपद्धती (SOP) तयार करण्याचे आदेश दिले आहेत. या एसओपीमुळे उमेदवारांची वैयक्तिक व कौटुंबिक माहिती पडताळणी अधिक काटेकोरपणे केली जाईल, जेणेकरून कायद्याचे उल्लंघन होणार नाही.

राज्यातील सर्व जिल्हा प्रशासन व निवडणूक अधिकारी यांना लवकरच या संदर्भातील सविस्तर मार्गदर्शक सूचना देण्यात येणार आहेत.

या निर्णयामुळे येत्या स्थानिक स्वराज्य संस्थांच्या निवडणुकांमध्ये तीन किंवा अधिक अपत्य असलेल्या उमेदवारांना अपात्र ठरविण्याची प्रक्रिया अधिक कडक होणार आहे.

प्रतिनिधी : श्याम शिरसाठ