📰 दृष्टिहीन माला पापळकरचा प्रेरणादायी प्रवास – 32 वर्षांपूर्वी बेवारस अवस्थेत सापडलेली आज नागपूर कलेक्टर कार्यालयात अधिकारी!

📰 दृष्टिहीन माला पापळकरचा प्रेरणादायी प्रवास – 32 वर्षांपूर्वी बेवारस अवस्थेत सापडलेली आज नागपूर कलेक्टर कार्यालयात अधिकारी!

नागपूर :
32 वर्षांपूर्वी जळगाव रेल्वे स्थानकाजवळ बेवारस अवस्थेत सापडलेली एक लहान मुलगी… कोणालाही माहीत नव्हते की, हीच मुलगी एक दिवस समाजासाठी प्रेरणास्त्रोत ठरेल. ती म्हणजे माला पापळकर — आज महाराष्ट्र लोकसेवा आयोगाची परीक्षा उत्तीर्ण होऊन नागपूर कलेक्टर कार्यालयात अधिकारी म्हणून कार्यरत आहे.

दृष्टिहीन असूनही मालाने आपल्या जिद्द, मेहनत आणि चिकाटीच्या बळावर अशक्य वाटणारे साध्य केले आहे. तिच्या या प्रवासामागे समाजसेवक आणि पद्मश्री पुरस्कार विजेते शंकर बाबा पापळकर यांचा मोलाचा वाटा आहे. त्यांनी तिला दत्तक घेऊन केवळ शिक्षणाचाच नाही, तर आत्मविश्वासाचाही आधार दिला.

माला सांगते, “शंकर बाबा यांनी मला वडिलांसारखा आधार दिला. रोज सहा ते सात तास अभ्यास करून मी एमपीएससीची परीक्षा पास केली. त्यांनी माझ्या स्वप्नांना कधीही थांबू दिले नाही.”

तिच्या या संघर्षमय प्रवासातून एकच संदेश मिळतो — अंधार कितीही गडद असला तरी, जिद्द आणि परिश्रमाची ज्योत पेटवली तर यश नक्कीच मिळते.

मालाचा हा यशप्रवास केवळ प्रेरणादायी नाही, तर समाजाला नवा दृष्टिकोन देणारा आहे. नागपूरच्या या “प्रेरणेच्या किरणा”ला सर्व माध्यमांतून प्रसार व्हावा, हीच अपेक्षा.

🖋️ प्रतिनिधी – उमेश कुलकर्णी