📰 पुण्यात धक्कादायक प्रकरण : पोलीस उपनिरीक्षकाला ४६.५ लाखांची लाच घेताना रंगेहाथ पकडले!

पुणे :
पिंपरी-चिंचवड पोलीस आयुक्तालयाच्या आर्थिक गुन्हे शाखेतील पोलीस उपनिरीक्षक प्रमोद रवींद्र चिंतामणी यांना लाचलुचपत प्रतिबंधक विभागाने (एसीबी) रविवारी, २ नोव्हेंबर २०२५ रोजी रास्ता पेठ येथे तब्बल ४६ लाख ५० हजार रुपयांची लाच घेताना रंगेहाथ पकडले आहे.

मिळालेल्या माहितीनुसार, चिंतामणी यांनी एका वकिलाकडून त्यांच्या क्लायंटच्या फसवणूक प्रकरणात मदत आणि सवलत मिळवून देण्यासाठी सुरुवातीला दोन लाख रुपयांची मागणी केली होती, मात्र ती मागणी नंतर दोन कोटी रुपयांपर्यंत वाढवली गेली. या प्रकरणात संबंधित वकिलाने २७ ऑक्टोबर रोजी एसीबी कार्यालयात तक्रार दाखल केली होती.

तक्रारीची पडताळणी करून एसीबीने सापळा रचला आणि रविवारी रास्ता पेठ परिसरात १.५ लाख खऱ्या आणि ४५ लाख बनावट नोटा देण्यात आल्या, त्या वेळी चिंतामणी यांनी लाच स्वीकारल्याचे उघड होताच त्यांना रंगेहाथ अटक करण्यात आली.

या प्रकरणी चिंतामणी यांच्याविरुद्ध लाचलुचपत प्रतिबंधक कायद्यानुसार गुन्हा नोंदवण्यात आला असून पुढील तपास सुरू आहे.

संपूर्ण घटनेमुळे पोलीस दलात मोठी खळबळ उडाली आहे.

प्रतिनिधी उमेश कुलकर्णी पुणे