‘सकाळ आयोजित सकाळ संगे स्वर सावनी’ दिवाळी पहाट कार्यक्रमाला चिंचवडकरांचा उत्स्फूर्त प्रतिसाद

📰 ‘सकाळ आयोजित सकाळ संगे स्वर सावनी’ दिवाळी पहाट कार्यक्रमाला चिंचवडकरांचा उत्स्फूर्त प्रतिसाद

चिंचवड, दि. २२ ऑक्टोबर २०२५ :
पाडव्यानिमित्त ‘सकाळ’ आयोजित ‘सकाळ संगे स्वर सावनी’ हा दिवाळी पहाट कार्यक्रम आज सकाळी ६ वाजता मोरे सभागृह, चिंचवड येथे अत्यंत उत्साहात पार पडला. चिंचवडकरांनी या कार्यक्रमाला मनापासून आणि उत्स्फूर्त प्रतिसाद दिला.

हा आकर्षक कार्यक्रम सावनी रविंद्र आणि त्यांच्या टीमने सादर केला. संगीत, स्वर आणि आनंदाच्या संगतीत रंगलेल्या या कार्यक्रमात ‘गोमू संगतीने माझ्याशी येणार काय’, ‘येड लागलं रे येड लागलं’, ‘प्रेमाचा गुलकंद’, तसेच ‘बाई पण भारी देवा’ या लोकप्रिय मराठी गाण्यांवर प्रेक्षकांनी ठेका धरला.
‘बाई पण भारी देवा’ या चित्रपटातील गाण्यावर तर सर्व महिलांनी स्टेजवर जाऊन नृत्य करत धमाल केली आणि सभागृहात आनंदाचा माहोल निर्माण झाला.

‘जय देवी मंगलगौरी’, ‘आंबा बाईचा उदो, अंबाबाईचा उदो’ अशा भक्तीगीतांनी दिवाळी पहाट अधिक मंगलमय बनवली.
कार्यक्रमातील एक विशेष प्रसंग म्हणजे — एका आजीबाईंनीही स्टेजवर जाऊन नृत्य करून सर्वांचं लक्ष वेधून घेतलं. प्रेक्षकांनी त्यांना टाळ्यांचा कडकडाट देत उत्स्फूर्त प्रतिसाद दिला.

शेवटी ‘मराठी पाऊल पडते पुढे’ या प्रेरणादायी गीताने कार्यक्रमाची सांगता झाली. या गाण्याने उपस्थितांमध्ये मराठी संस्कृतीचा अभिमान आणि एकात्मतेची भावना जागवली.

दिवाळीच्या आनंदात संस्कृतीचा स्पर्श देणारा ‘सकाळ संगे स्वर सावनी’ हा कार्यक्रम खऱ्या अर्थाने चिंचवडकरांसाठी अविस्मरणीय ठरला.

✍️ प्रतिनिधी : उमेश कुलकर्णी, पुणे