अचानक पाऊस आणि भाऊबीज – भोसरीकरांची धावपळ
भाऊबीज खरेदीत पावसाने अडथळा; बाजारपेठेत साचले पाणी, वाहतूक कोंडी
भोसरी | प्रतिनिधी
अचानक आलेल्या पावसाने भाऊबीजेच्या खरेदीत भोसरीकरांची चांगलीच धावपळ उडाली. सकाळपासून उन्हाचे वातावरण असले तरी दुपारी अचानक आलेल्या पावसाच्या सरींनी नागरिकांची खरेदीची घाई वाढवली.
भाऊबीज निमित्ताने फुलं, मिठाई, कपडे, गिफ्ट आणि फराळाच्या वस्तूंसाठी बाजारपेठा गजबजल्या होत्या. मॅगझिन रोड, मुख्य बाजार, चोवीसावडी, एमआयडीसी परिसरात ग्राहकांची गर्दी होती. मात्र अचानक आलेल्या पावसामुळे अनेक ठिकाणी पाणी साचले, रस्त्यांवर वाहतूक कोंडी झाली, तर दुचाकीस्वार व पादचारी नागरिकांना अडचणींना सामोरे जावे लागले.
पावसामुळे काही दुकानदारांनी घाईघाईने शटर खाली ओढले; तरीही भावंडांच्या प्रेमाच्या या सणासाठी नागरिकांनी पावसातही खरेदी पूर्ण केली. काही ठिकाणी वाहतूक पोलिसांचा अभाव जाणवला.
भाऊबीजेच्या उत्साहात पावसाने थोडा अडथळा आणला असला तरी, वातावरणात सणाचा उत्साह आणि आनंदाची सरच पसरली.
भोसरी प्रतिनिधी
विजय अडसूळ 9623113336
