📰 ज्येष्ठ वनस्पतीशास्त्रज्ञ डॉ. हेमा साने यांचे निधन

📰 ज्येष्ठ वनस्पतीशास्त्रज्ञ डॉ. हेमा साने यांचे निधन

पुणे : विजेविना साधे जीवन जगणाऱ्या “विजेविणा जगणाऱ्या आजी” म्हणून प्रसिद्ध असलेल्या ज्येष्ठ वनस्पतीशास्त्रज्ञ आणि पर्यावरणप्रेमी डॉ. हेमा साने यांचे आज, शुक्रवार, वयाच्या ८५व्या वर्षी निधन झाले.

१९६० पासून त्यांनी विजेविरहित जीवनाचा संकल्प करून तो आयुष्यभर पाळला. टीव्ही, फ्रीज, पंखा अशा उपकरणांचा वापर टाळून त्यांनी निसर्गाशी एकरूप होऊन जीवन व्यतीत केले. बुधवार पेठेतील त्यांच्या निवासस्थानाभोवती नेहमीच झाडांचे हिरवे आच्छादन, झुडपांचा सुगंध आणि पक्ष्यांचा किलबिलाट अनुभवायला मिळत असे.

शैक्षणिक क्षेत्रातही त्यांचे योगदान लक्षणीय राहिले. सावित्रीबाई फुले पुणे विद्यापीठातून त्यांनी एम.एस्सी. आणि पीएच.डी. (वनस्पतीशास्त्र), तसेच भारतविद्या शास्त्रात एम.ए. आणि एम.फिल. पदव्या संपादन केल्या. पुण्यातील आबासाहेब गरवरे महाविद्यालयात विभागप्रमुख म्हणून त्यांनी दीर्घकाळ अध्यापन केले.

डॉ. साने यांच्या लेखणीतून आपले हिरवे मित्र, बुद्ध परंपरा आणि बोधीवृक्ष, तसेच पुणे परिसरातील दुर्मिळ वृक्ष अशी पुस्तके प्रकाशित झाली असून ती आजही संदर्भग्रंथ म्हणून अभ्यासली जातात.

त्यांच्या निधनाने पर्यावरणप्रेमी, विद्यार्थी व शैक्षणिक क्षेत्रात हळहळ व्यक्त केली जात आहे.

✍🏻 प्रतिनिधी : उमेश कुलकर्णी, पुणे

9822548429